Finansije i Osiguranje - Makedonija

Со 4 милиони евра Фондот за иновации ќе кофинансира 69 компании

„Во рамките на овој повик, во вкупен износ од 14 милиони евра, со 4 милиони учествува ФИТР, а приватниот сектор со 10 милиони евра. На овој јавен повик се поддржани 69 компании, кои се подготвени со нашата минимална поддршка да инвестираат во економијата и во економското заздравување на државата“, рече директорот на ФИТР, Јован Деспотовски, на денешната прес-конференција.

Деспотовски нагласи дека во најголем процент поддржани се се микро и мали компании, а само 2 отсто од нив се големи компании.

„Ова покажува дека имаме домашни компании кои и во услови на криза се подготвени да инвестираат во приспособување и развој, а со тоа и во побрзо заздравување на домашната економија. Побрзо надминување на кризата не само за вработените во овие компании туку за сите наши сограѓани“, изјави Деспотовски.

Од вкупно 69 компании, 36 се поддржани во редовна, а 33 се од скратена постапка. Меѓу нив, 38 се компании што се јавуваат вторпат, a според Деспотовски, очигледно се развива култура на упорност и овие компании покажуваат дека имаaт доверба во Фондот за инвестициски развој.

Од одобрените инвестициски проекти, најголем дел, 11, е во областа на медицината и здравството, што покажува дека државата и приватниот сектор сега вложуваат во зајакнување на капацитетите за справување со последиците од кризата и подготвеност во иднина.

Половина од апликантите се од Скопје. Во структурата на управители апликанти има мал број жени.

„Верувам дека жените се поподготвени за преземање деловни ризици, но во овој момент само 29 се жени. Се надевам дека во иднина ќе бидат охрабрени повеќе“, рече Деспотовски.